Футболда бўй, вазн ва асосийси, ёш катта аҳамиятга эга. Айрим футболчилар номаълум сабабларга кўра, фаолиятларини эрта якунлашса, бошқаларида бунинг акси кузатилади. Қуйида 40 ёшдан ўтган бўлса-да, ҳамон майдонда жавлон ураётган ўйинчилар билан таништирамиз.
10. Юсси Яаскелайнен, 40 ёш, («Вест Хэм Юнайтед», Англия)
15 йил давомида «Болтон» шарафини ҳимоя қилган финляндиялик дарвозабон 2012 йилда жамоасини алмаштиришга қарор қилади. Аммо унинг «Вест Хэм»даги фаолияти унчалик омадли чиқмайди. Шундай бўлса-да, Юсси бутсаларини михга илишга шошилмаяпти.
Ўтган мавсумда лондонликлар дарвозасини атиги 2та ўйинда қўриқлаган Яаскелайненнинг шу ёзда клубини алмаштириши ёки футболчилик фаолиятини якунлаши ҳам эҳтимолдан холи эмас. Буни эса вақт кўрсатади.
9. Александр Шовковский, 40 ёш («Динамо» Киев, Украина)
Киевликлар таркибида 22 йилдан буён фаолият олиб бораётган украиналик дарвозабон жамоа билан кўплаб муваффақиятларга эришди. 2014 йили Блохиннинг «Динамо»си таркибида 582та ўйиндан иборат рекордини босиб ўтди. Фахрий кипер ҳамон киевликларнинг асосий дарвозабони бўлиб қолмоқда. Александр ўтган мавсумда 16та ўйинда майдонга тушиб, ўз дарвозасидан бор-йўғи 7та тўп олиб чиқди. Ўйлаймизки, ушбу кўрсаткич билан Шовковскийнинг фаолияти яна 1-2 йилга чўзилади.
8. Алессандро Дель Пьеро,
40 ёш («Дели Динамос», Ҳиндистон)
Жаҳон футболининг афсонаси жорий йилнинг 9 ноябрида 41 ёшга тўлади. Аммо у ҳозиргача ўзи севган касбдан йироқлаша олмаяпти. Алессандро севимли клуби «Ювентус»дан кетиб, Австралиянинг «Сидней» жамоаси таркибига қўшилди. У мазкур клубда йилнинг энг фойдали футболчиси бўлибгина қолмай, «яшил қитъа» чемпионати тўпурари ва энг яхши ўйинчиси, дея тан олиниб, ички биринчиликнинг рамзий терма жамоасидан жой олди. Ўтган йилнинг ёзида Алессандро футбол тобора ривожланиб бораётган мамлакат - Ҳиндистонда фаолиятини давом эттиришга қарор қилди. Италиялик футбол фахрийсининг кўрсаткичлари аввалгидек сермаҳсул бўлмаса-да, Дель Пьеро олдингидек юқори савияли футбол намойиш этмоқда ва бу туришида яна 1-2 йил футбол ўйнай олишига кўзи етади. Алессандро Австралия ва Осиё қитъасидаги саёҳатларидан сўнг, балки ҳамкасблари Жеррард, Лемпард ва Пирло каби АҚШнинг бирорта клубида ўзини синаб кўрар? Буни вақт кўрсатади.
7. Роман Березовский, 40 ёш («Динамо», Россия)
Арманистон терма жамоаси дарвозабони Роман Березовский Станислав Черчесов Москванинг «Динамо» клубига бош мураббий бўлиши биланоқ, асосий посбон бўлиш имкониятини қўлга киритди. Натижада, 40 ёшни уриб қўйган Роман 2013|2014 йиллар мавсумида 6та ўйин ўтказиб, шунча тўп ўтказиб юборди. Березовский учун муваффақиятсиз кечган воқеа эса «Зенит» билан бўлган баҳсда кузатилди. Фаолиятини қайта тиклаётган кипер «Петровский»да ўтказиб юборилган 3та голдан сўнг яна фаолиятини буткул якунлашга қарор қилди. Бироқ, Арманистон терма жамоасидаги фаолиятини якунлаганича йўқ. Бу йилдан эса «Динамо» (Москва)да дарвозабонлар мураббийи сифатида фаолият олиб бормоқда.
6. Зе Роберто, 41 ёш («Палмейрас», Бразилия)
41 ёшли бразилиялик чарм тўп устаси яқинда «Палмейрас»да ўз «дубл»ини қайд этди. Зе Роберто 7 йил давомида Мюнхеннинг «Бавария» клуби шарафини ҳимоя қилган. Фахрий ҳужумчи сўнгги йилларда «Гремиу» ва бу йилдан «Палмейрас»да фаолиятини давом эттирмоқда. ЖЧ-2002 турнирини ўтказиб юборган Зе Роберто ўз фаолиятидан мамнун кўринади чоғи, юқори савияда яна 2-3 мавсум футбол ўйнаш ниятида. Нимаям дерлик, ахир орзуга айб йўқ, дейдилар.
5. Руслан Ажинжал, 41 ёш («Краснодар», Россия)
Жорий йилнинг апрелида «Краснодар» клуби бош директори Владимир Хашиг Русланннинг футболчилик фаолиятидаги 700-ўйинида унга эсдалик тариқасида совға ҳадя қилди ва бу мухлислар томонидан олқишлар остида кутиб олинди. Яқинда 41 ёшни қаршилаган Ажинжал юбилей учрашувини ўтган мавсумнинг 22-турида «Рубин»га қарши майдонга тушиш орқали нишонлади. Русланнинг юбилей баҳсида «буқалар» Қозон клуби устидан 2:1 ҳисобида ғалаба қозонишди. Мазкур ўйинда қаҳрамонимиз охирги дақиқаларда захирага олинди. Ўтган мавсум давомида турли мусобақаларда 12 марта асосий таркиб футболчиси сифатида майдонда кўриниш берган Руслан фаолиятини ўз хоҳиши билан якунлаб, ўзини бошқа соҳада синаб кўриш истагида.
4. Рожерио Сени, 42 ёш («Сан-Паулу», Бразилия)
Машҳур тўпурар-дарвозабон 42 ёшни уриб қўйган бўлса-да, мухлисларни ҳамон чиройли сэйвлари ҳамда ноодатий голлари билан хушнуд этиб келмоқда. Рожерио яқинда ҳужумкор ярим ҳимоячи амплуасидаги жамоадоши Марселиньо Кариока қайд этган рекорд, яъни бир клуб сафида жарима тўпларини амалга ошириш бўйича ундан ўтиб кетди. Дарвозабоннинг амалга оширган жарима зарбаларининг нақд 62таси якунда гол билан якунланган. «Сан-Паулу» шарафини 1993 йилдан буён қўриқлаб келаётган Сени бу туришда ўз жойини бошқа посбонга бўшатмоқчи эмас. Боз устига, клуб мухлислари уни тарихдаги энг яхши дарвозабон, ҳатто энг яхши футболчи сифатида ҳам ҳурмат қилишади.
3. Марк Шварцер, 42 ёш («Лестер Сити», Англия)
Ўтган мавсумда австралиялик посбон «Челси»нинг муваффақиятларига муносиб улуш қўша олмади, лекин маҳоратли Петр Чехнинг муносиб вориси бўла олди. Умуман олганда, Шварцернинг узоқ вақт фаолият олиб боришига юқори савияли футбол кўрсатган бўлса-да, бирорта йирик совринни эгаллай олмагани сабаб бўлмоқда. Марк Австралия терма жамоаси билан Океания кубогини қўлга киритган бўлса-да, клублар билан ҳеч қандай совринга эришмаган. «Мидлсбро» билан Европа Лигаси, «Фулхэм» билан УЕФА кубоги финаллари иштирокчиси бўлган дарвозабон кўзга кўринарли ютуқларга эришмаган. Шу боис, Шварцер ўз келажаги борасида яқин кунлар ичида ўйлаб кўрмоқчи.
2. Ким Бьюн Жи, 45 ёш («Чуннам Драгонс», Жанубий Корея)
Кореялик афсонавий кипер фаолиятидаги энг омадcиз кунларни Францияда бўлиб ўтган ЖЧ-98 турнири деб ҳисоблайди. 2002 йилда турнир мезбони бўлган Жанубий Корея термаси бошқарувини қўлга олган Хиддинк шогирдлари қаторидан Ким Жи ҳам жой олганди, бироқ асосий посбон сифатида эмас. Жанубий Корея термасининг кўп йиллик аъзосига ишонч билдирмаган мураббий Гус Хиддинк кейинчалик бунинг учун ундан шахсан кечирим сўради. Аммо бундан не наф?
45 ёшли Бьюн Жи Корея чемпионатида фаолият олиб бормоқда. У ёш ҳамда «қуруқ ўйинлар» бўйича барча рекордларни забт этиб бўлди. Жанубий Корея терма жамоасининг собиқ посбони фаолиятини якунлагач, мураббий ёки маъмур лавозимида фаолият олиб бориш ниятида.
1. Казуоси Миура, 48 ёш, («Йокогама», Япония)
Осиё футболининг яна бир ёрқин вакилларидан бири Казуоси Миура япониялик футбол мухлислари учун Наката, Кагава, Хонда каби донғи чиққан футболчилардан кўра кўпроқ ардоқлироқ. Казуоси 1990-йилларнинг бошида Бразилиянинг машҳур «Сантос» клуби, кейинчалик Италиянинг ўртамиёна «Женоа» жамоасида фаолият юритди. Япония терма жамоаси либосида расмий ўйинларда 89 марта майдонга тушиб, 55та голга муаллифлик қилган.
Миура сўнгги 7 йилдан буён маҳаллий «Йокогама» клубида тўп сурмоқда. Ҳужумчи Япония J-лигаси мухлисларининг эътиборини ўзига тортгани, унинг 50 ёшга яқинлашиб қолса ҳам, юқори савияда футбол намойиш этаётганидир. Фахрий ҳужумчи ҳар йили футболни тарк этиш ҳақида бош қотиради, лекин шартномасини яна узайтиришларига қарши чиқмайди. Балки, Казуоси 50 ёшгача футбол ўйнаб, ўз ҳамкасбларига қариликни унутишларига ёрдам беришни мақсад қилгандир? Ахир, бунга оз вақт қолди.
Акмал ЭШОНХЎЖАЕВ тайёрлади, "ИнтерСПОРТ" газетаси
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
