“Орол” – “Оқ-тепа” (0:1) учрашувини томоша қилиб ўтирган пайтимиз ёнимизга иқтидорли футболчи Наврўз Алимов келди. Биз у билан учрашувни томоша қилдик ва эртаси куни у билан суҳбат уюштиришни режалаштирдик. Наврўз айтилган жойга вақтида келди. Очиғи суҳбатимиз бу қадар кўп давом этади деб ўйламаган эдим. Саволлар олдиндан тузилмаган эди, ҳаммаси суҳбатдан келиб чиқиб давом этди. Интервью анча чўзилиб кетгани учун ҳам уни алоҳида қисмларга бўлиб сизнинг эътиборингизга ҳавола қилишни лозим деб топдик.
Суҳбатнинг биринчи қисми Наврўзнинг клублардаги фаолияти, илк устозларидан тортиб илк маошига бўлди. Қуйида ана шу суҳбатни ўқишингиз мумкин.
1. Нега айнан футболни танладингиз?
Болалигимдан кўчада футбол ўйнаб юрар эдик ва шу орқали футболга бўлган мухаббатим ортти.
2. Ота-онангиз бунга қаршилик қилмадими?
Бошида онам қарши бўлдилар. Биласиз футболда жароҳатлар кўп бўлади. Бир куни оёғим қайрилди, бир куни эса қўлим синиб уйга келганимда, онамдан танбеҳ эшитганман. Лекин шунга қарамай футболга қатнадим ва ўзимни кўрсата бошлаганимдан сўнг, онамни ўз томонимга оғдириб олдим (кулади)
3. “Орол”даги дебют ўйининггиз эсингиздами?
Эсимда албатта. 2007 йилда “НБУ Осиё” билан сафарда дуранг ўйнаганмиз.
4. Биринчи голингизчи?
Ростини айтсам биринчи голим эсимда йўқ.
5. Биринчи устозингиз ким?
Биринчи устозим Шакир ака Ниязов эди. Футбол интернатга қатнай бошлаганимдан сўнг эса Аҳмет Утемуратовнинг қўл остида шуғулландим.
6. Энг омадли мавсумингиз қайси бўлди?
2013/14 йилги мавсумлар мен учун энг омадлиси бўлди десам асло янглишмайман.
7. “Орол”дан “Динамо”га ўтгандингиз…
2012 йилда ижара асосида ушбу жамоа сафига ўтган эдим. Бироқ у ерга борган заҳотим операция бўлдим ва бирорта учрашувда иштирок этмасдан, ортга қайтиб келишимга тўғри келди. Ундан кейинг йили эса “Қизилқум”га ўтдим.
8. “Қизилқум”га йўл олишингизга ким сабабчи бўлди?
Бунга биринчи сабабчи бўлган инсон ёшлар терма жамоасининг ўша пайтдаги устози Алексей Евстафеев эди. Мен унинг қўл остида маълум вақт шуғулланган эдим. Айнан у киши мени “Қизилқум”га тавсия қилдилар ва шу тариқа Навоий клубига ўтдим.
9. Биринчи маошингиз қанча эди?
Ойлик тўғрисида гапирмай қўя қолай.
10. Майли, фақат биринчиси ҳақида айтақолинг.
“Орол”даги илк маошим 150 минг эди.
11. Нимага сарфладингиз ўша илк маошингизни?
Албатта ота-онамга олиб бориб бердим. Ота-онам ўғлимизнинг биринчи ойлиги деб хурсанд бўлиб ош пишириб байрам қилишган эди.
12. Футболчилик фаолиятингизда дарвозада турган пайтингиз бўлдими?
Йўқ, бунақаси ҳали бўлмаган.
13. Энг эсда қоларли ўйин қайси бўлди.
Бунақалари жуда кўп.
14. Келинг унда энг омадли ва энг омадсизи ҳақида тўхталиб ўтақолинг.
Энг омадлиси барибир терма жамоамиз сафида БАА терма жамоасига урган голим бўлса керак. Ўша ўйинни ҳеч қачон эсимдан чиқармайман.
15. “Бунёдкор”га урган голингизчи?
Биласизми энди буниси алоҳида-да. Бу ўзимизни чемпионатда урган энг эсда қоларли голим. “Пахтакор”дан “Қизилқум”га қайтиб келганида кўпчилик Наврўз энди қандай ҳолатда экан, ўйнаб кета олармикан деб ўйлаб турган эди ва мендан кўп нарса кутишаётган эдилар. Худога шукр ўша ўйинда омадим келиб, яна мухлислар ишончига кира бошладим.
16. Энг омадсиз ўйининггиз ҳақида айтмадингиз?
Ўтган мавсумда Самарқанднинг “Динамо”сига қарши ўйин бўлса керак. Ўша ўйинда биз 2:0 ҳисобида юттик. Бироқ барибир бир нечта имкониятларни кўкка совурдим. Омад ўшанда ҳақиқатдан ҳам менда юз ўгирган эди.
17. Мураббийлар майдонда сиздан нимани талаб қилишади?
Биласиз ҳужумчи бўлгандан кейин вазифа гол уриш! Мураббийлар асосан мени марказий ҳужумга қўйишади. Лекин баъзи-баъзида қанотларда ҳам ўйнаб тураман. Умуман олганда мураббий қаерга қўйса ўша жойда ўйнаб кетавераман.
18. Кимгадир тақлид қиласизми?
Европадами ёки ўзимизданми?
19. Иккаласидаям.
Ўзимизда энди Анвар Солиев, Анвар Бердиев, Неъматулло Қуттибоев бор. Европадан эса иккита Роналдо ва Шевченко бор.
20. Нима деб ўйлайсиз “Орол” нима учун Олий лигага чиқа олмаяпти?
Шахсий фикрим, барибир молиявий тарафга боғлиқ.
21. Футболкадаги рақамингизни ўзингиз танлайсизми?
Ҳар доим ҳам эмас. Баъзан иложсиз катта рақам олишимга тўғри келиб қолади. “Қизилқум”да менга ўзим истаган рақамни олишимни айтишди. Шунда мен “44” рақамини танладим. Шундан кейин жамоадошларим менга хазиллашиб энди Тимошук бўласан марказда ўйнайсан дея бошлашди.
22. Ўзингиз ёқтирган рақамингиз қайси?
Менга кўпроқ “9” ва “11” ёқади.
23. “Пахтакор”дан нимага кеттингиз ва кейинчалик “Навбаҳор”га бориб қўшилиб сўнгра кутилмаганда “Қизилқум”га қайттингиз?
“Навбаҳор”га мени Бахтиёр Ашурматов чақирди. У билан терма жамоада бирга ишлаган эдик. Ўша пайтлари Наврўз Наманганга кел, бизни жамоада ўйнайсан дея таклиф билдирган эди. Биринчи даврадан кейин яна таклиф билдирди. Шундан сўнг у ерда машғулотларда иштирок этиб “Навбаҳор”да қоладиган бўлдим. Бироқ “заявка”га икки кун қолганида “Қизилқум”дан чиқишди. Хамид Актамов телефон қилиб, яна бизга қайт деди. Шунда мен “Навбаҳор” билан келишиб қўйдим, энди сўзимни устидан чиқишим керак, яхшиси сизлар Наманганликлар билан келишинглар дедим. Сўнгра иккала жамоа келишиб олишганидан кейин, “лочинлар” билан дўстона хайрлашдим.
Фурқат Юсупов, Адил Алланиязов суҳбатлашди
Манба: www.Furkat.uz
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
