9 июнь куни қитъамиз клублари учун энг нуфузли саналган турнир - ОЧЛнинг якуний босқичларига қуръа ташланди. Бошқача айтганда, курашни давом эттираётган 8та кучли жамоанинг финалгача бўлган йўли аниқлаб берилди. Эътиборлиси, «A», «D» ва «F» гуруҳларидан чиққан клублар чорак финалга синхрон тарзда етиб келишди. Умуман, аслида турнирда 17та чемпионат вакиллари курашга киришган бўлсалар, бугунга келиб, атиги 5та мамлакат (БАА, Қатар, Ўзбекистон, Хитой ва Жанубий Корея)дан жамоа қолди, холос. Энди қуръа натижасига тўхталсак, кўзга ташланадиган биринчи эътиборли факт шуки, Тошкентнинг «Локомотив» ва таркибида ҳамюртимиз Сардор Рашидов тўп сураётган «Ал-Жаиш» клублари ярим финалдагина ўзаро учрашишлари мумкин.
«Ал-Айн» (БАА) - «Локомотив» (Ўзбекистон)
Кимларнинг ўзаро дуэлини кўрамиз? Умар Абдулраҳмон - Сардор Мирзаев
Учиш масофаси:2 323 км.
«Локомотив» чорак финал босқичини 23 август куни БААнинг «Ал-Айн» клубига қарши сафар ўйини билан бошлайди. Тошкентда кечадиган жавоб учрашуви эса 13 сентябрга белгиланган. «Ал-Айн» БАА про-лигасининг охирги мавсумини 2-ўринда тугатди (чемпион - «Ал-Аҳли»дан 9 очко ортда қолди).
Маълумот ўрнида эслатиб ўтамиз, «Ал-Айн» бу йилги ОЧЛда «Насаф» билан битта гуруҳда кураш олиб борди ва 10 очко тўплаб, 2-ўрин орқали «плей-офф»га чиқди. 1|8 финални «Зоб-Оҳан»га қарши ўтказган ушбу жамоа ўз майдонида дуранг (1:1) қайд этган бўлса, сафарда 2:0 ҳисобида зафар қучди. Бу ўйинларда ҳам «Ал-Айн» легионерлари - Дуглас ва Данило Асприлья биттадан гол уришди. Умуман олганда, бўлажак рақибнинг ўйини кўп жиҳатдан шу икки легионер, шунингдек, жамоа сардори Умар Абдулраҳмонга боғлиқ.
«Ал-Айн» ОЧЛ-2016да шу кунга қадар жами 19 нафар футболчидан фойдаланди. Майдондаэнг кўп вақт ҳаракатланганфутболчи: Мёнг Жу Ли (720 дақиқа). Голлар муаллифлари: Дуглас - 4та, Данило Морено Асприлья - 3та, Умар Абдулраҳмон, Мёнг Жу Ли, Саид ал Хатирий, Исмоил Аҳмад - 1тадан.Энг кўп сариқ карточка олган футболчилар:Муҳаммад Фаёз, Муҳаммад Абдулраҳмон - 2тадан. Жамоа устози Златко Далич кўпроқ 4-5-1 тактикасига таянади.
«Локомотив»га келсак, жамоа мураббийлари худди «Ал-Айн»даги ҳамкасблари каби жорий мавсум айнан 19 нафар футболчини майдонга туширишди. Майдондаэнг кўп вақт ҳаракатланганфутболчи:Игнатий Нестеров (720 дақиқа). Голлар муаллифлари: Темурхўжа Абдухолиқов - 3та, Сардор Мирзаев - 2та, Шерзод Файзиев, Ислом Тўхтахўжаев, Марат Бикмаев - 1тадан. Энг кўп сариқ карточка олган футболчи: Кахи Махарадзе - 3та. Қизил карточка олган футболчи - Жасур Ҳасанов.int.soccerway.com веб-сайтида таъкидланишича, «темирйўлчилар» асосан 3-6-1 тактик чизмаси асосида ўйин олиб боришган.
«Ал-Жаиш» (Қатар) - «Ал-Наср» (БАА)
Кимларнинг ўзаро дуэлини кўрамиз? Сардор Рашидов - Нилмар
Учиш масофаси: 379 км.
«Ал-Жаиш» 2013 ва 2015 йилларда ҳам БАА вакиллари билан учрашган эди. «Ал-Жазира»га қарши ўз майдонида кечган баҳсда 3:1 ҳисобида ғалаба қозонган бўлса, сафарда муроса кўчасини танлаганди - 1:1. Қолаверса, қатарликлар жорий мавсум «Ал-Айн»ни 2 марта бир хил - 2:1 ҳисобида мағлуб этишди. «Ал-Жаиш»да ҳам легионерлардан қандай фойдаланишни яхши билишади. Олдинги йилларда бош юлдуз саналган Вагнер Рибейро асосий таркибга кириш учун курашда ҳамюртимизга имкониятни тўлиқ бой берди. Сардордан ташқари, Абдулраззоқ Ҳамдалллоҳ ва Ромариньога ҳам бошланғич таркибдан жой кафолатланган. Ҳимоя чизиғида асосий оғирлик кўпроқ 25 ёшли Холид ал Зерейкий ва 20 ёшли Аҳмад Дузандеҳга тушмоқда. Тўғри, ҳимоядаги муаммолар ярим ҳимоянинг беқиёс ўйини туфайли унча билинмаяпти. Клуб ОЧЛ-2016да 8та ўйин ўтказган бўлса, шуларнинг атиги 3тасида гол қўйиб юбормади.
8та ўйинда жами 15та сариқ карточка «тўплаган» «Ал-Наср» клубида эса бор эътибор жамоавий ўйинга қаратилган. Ҳужумчилар - Нилмар ва Салим Солиҳ унча-мунча клуб ҳимоячиларига ҳақиқий бош оғриғи бўлишга қодирлар. Ҳимоячилар - Маҳмуд Ҳамис ва Аҳмад ал Яссийни ҳам алоҳида эътироф этиш керак. Дейлик, улар яккакурашлар ва меҳнатдан сира қочмайдиганлар сирасига киришади.
«Шанхай Теллэйс» (Хитой) - «Чонбук Хюндай Моторс» (Ж.Корея)
Кимларнинг ўзаро дуэлини кўрамиз? Лей Ву - Леонардо
Учиш масофаси: 732 км.
Хитойнинг бу жамоаси ОЧЛда илк марта иштирок этяпти. «Теллэйс» гуруҳ босқичида Ж.Кореянинг «Сувон Самсунг Блюуингз» клуби билан ўйнади (2:1, 0:3). Хитой терма жамоасининг шу ой олиб борган йиғинига жамоадан 5 нафар футболчи чақирилди. 25 ёшли Лей Ву Шанхай шаҳри жамоасининг ҳақиқий дурдонасидир. Маҳаллий супер-лигада 54та, шанхайликлар либосида эса жами 103та гол урган футболчи клуб тарихидаги энг яхши тўпурардир. Чап қанот вингери вазифасини эса Ю Хай бажармоқда. 2007|2008 йиллар мавсумида Голландиянинг «Витесс» жамоасида ўйнаган футболчи ҳозирги клуби сафига 2015 йилнинг 27 февралида қўшилган.
Ўтган йилги чорак финалчилар орасида биргина «Чонбук»нинг курашни давом эттираётгани эътиборга молик. Кореяликлар бир йил олдин «Гамба Осака» (Япония) тўсиғидан ўтолмагандилар. Улар худди «Ал-Айн» сингари турнирда бир марта ғолиб чиқишган. «Чонбук Моторс» бош мураббийи Чой Канг Хи жамоада 2005-2011 йиллар оралиғида ҳам ишлаганди. Муҳими, клуб 2006 йили ОЧЛдаги ғалабани айнан унинг раҳбарлигида нишонлаган.
«Сеул» (Ж.Корея) - «Шандонг Луненг» (Хитой)
Кимларнинг ўзаро дуэлини кўрамиз? Карлос Адриано - Диего Тарделли
Учиш масофаси: 891 км.
Кореяликлар бу рақиб билан 2009 йили гуруҳ босқичида (0:2, 1:1), қолаверса, бу йил ҳам айнан илк раундда (4:1, 0:0) тўқнаш келишган. Сеулдаги сўнгги баҳсни Равшан Эрматов бошқаргани ёдингизда бўлса керак. «Сеул» жорий мавсум гуруҳ босқичи 3-4-турларида «Луненг»дан 4 очко тортиб олди. Хусусан, 16 март куни Жинан шаҳрида бўлиб ўтган ўйиннинг иккинчи ярмида Го Йо Хан ва Деян Дамьянович урган голлар хитойликларни карахт аҳволга солиб қўйганди. Айтганча, «Сеул» ОЧЛда яна 3та гол урса, бу борада 100лик маррасини босиб ўтади.
«Шандон Луненг» 2005 йилдан сўнг яна чорак финалга йўл олди. Жинан шаҳри жамоаси ўшанда бўлажак чемпион «Ал-Иттиҳод» (1:1, 2:7)га йўл бўшатганди. Жамоага 8 июнь куни «Бавария» ва «Вольфсбург» билан 3 карра бундеслига чемпиони бўлган германиялик машҳур мутахассис Феликс Магат бош мураббий этиб тайинланди. Эслатма, «Темир Магат» 2014 йилнинг 18 сентябрида «Фулхэм» билан хайрлашганидан буён ҳеч қаерда ишламади. Хитой клуби ҳам жорий мавсум ОЧЛдаги голлари сонини 100тага етказиши мумкин. Айни пайт унинг ҳисобида 94та гол бор. Дарвоқе, ЖЧ-2018 саралашидаги рақибимиз - Хитой терма жамоаси охирги йиғинига ушбу жамоадан ҳам айнан 5 нафар футболчини жалб этди.
Фикрат тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
